Deskiñ ha Komz Brezhoneg

Karr An Ankoù

Miz even a oa, d'ar poent ma vez ar c'hezeg er-maez e-pad an noz.
Ur paotr yaouank eus Trelezan a oa bet o kas e gezeg da beuriñ en ur park.
Edo o tont d'ar gêr en-dro en ur sutal dindan ar c'hoann-loar pa glevas trouz ur c"harr o tostaat outañ.
Gwik ! Gwik ! Gwik ! Gwigour a oa gant ahel ar c'harr.

Kompren a reas diouzhtu e oa karr an Ankoù.
Mat ! Emezañ e mod-se e c"hellin gwelet ar c'harr-se ez eus kemend-all a anv diwar e benn.
Kuitaat a reas an hent hag ez eas da guzhat a-dreñv ur vodenn gelvez.

Edo ar c'harr o tostaat. Tri loen gwenn a oa sterniet outañ.
Daou waz gwisket e du, tokoù bras ganto, a oa gant ar c'harr.

Unan a oa o ren ar c'hezeg, unan all a oa en e sav war ar c'harr.
P'en em gavas ar c'harr dirak ar vodenn gelvez e voe klevet ur pezh strakadenn.
Chom a-sav ! a lavaras an hini a oa war ar c'harr d'egile.
Ha hemañ lavaret "ho ! ", hag ar c"hezeg chom a-sav.

Ibil an ahel a zo o paouez terriñ, a lavaras an Ankoù.
Kae da droc'hañ ur skourr diwar ar vodenn gelvez a zo aze !

Mevel an Ankoù a droc'has ur skourr.
Tailhañ a reas un ibil ha kempenn a reas ar c'harr.
Kerkent e loc'has adarre.

Mont a reas ar paotr yaouank d'ar gêr evel kustum.
Diouzh ar mintin avat e teuas terzhienn vras warnañ.
An devezh war-lec'h e voe lakaet e gorf er vered..

• Geriadur

• Notenn : Testenn lavaret gant Goulc'han Kervella - Strollad Ar Vro Bagan.